Stjórnvöld í Moskvu segja að ekki sé í bígerð að óska eftir framsali þeirra Rússa sem fara úr landi til að komast hjá herkvaðningu.

Tugir þúsunda Rússa hafa streymt úr landi eftir að Vladímír Pútín, forseti, tilkynnti um herkvaðningu 300.000 manna í síðustu viku.

Mikill straumur hefur verið til Kasakstan og Georgíu en einnig hafa Rússar streymt til Finnlands og Eistlands og annarra landa sem þeir geta komist til.

Í tilkynningu frá rússneska varnarmálaráðuneytinu segir að það hafi ekki sent neina beiðni til yfirvalda í Kasakstan, Georgíu eða öðrum löndum um að rússneskir ríkisborgarar verði neyddir til að snúa heim og hafi ekki í hyggju að gera það.