Í næstu viku verður kolaorkuver í Heyden, sem er nærri Hannover, endurræst og er ætlunin að það starfi fram í apríl á næsta ári. Rafmagni frá verinu verður beint inn á raforkuflutningskerfi landsins.

Orkufyrirtækið Uniper skýrir frá þessu en það sér um rekstur orkuversins.

Ástæðan fyrir gangsetningunni er orkuskortur vegna lítils framboðs af gasi en það má rekja til stríðsins í Úkraínu og deilna Rússa og Vesturlanda vegna þess.

Orkuverði er 875 megavött og er eitt hið stærsta í landinu. Þýsk stjórnvöld hafa í hyggju að hætta notkun kolaorkuvera í síðasta lagi 2038. En stríðið í Úkraínu og orkuskortur hefur neytt Þjóðverja til að taka nokkur kolaorkuver aftur í notkun.