Eins og fram hefur komið í fréttum að undanförnu þá er innrás Rússa í Úkraínu hluti af áætlun Vladímír Pútíns, forseta, um að endurreisa Rússland sem stórveldi. Hann hefur sjálfur sagt að til greina komi að leggja fleiri ríki undir Rússland, til dæmis Litháen.
En eftir því sem segir í skýrslu Civitas þá er norðurheimskautasvæðið mikilvægt svæði hvað varðar metnað Pútíns um að endurreisa Rússland sem stórveldi. Hugveitan kemst að þeirri niðurstöðu að Rússar séu að gera svæðið að „vígvelli framtíðarinnar“. Það muni gerast samhliða hlýnandi loftslagi sem hefur í för með sér að minni hafís verður á svæðinu og Norðaustursiglingaleiðin norðan við Rússland opnast sem og mörg önnur svæði. Þá verður hægt að vera með aukin hernaðarumsvif þar.
Jótlandspósturinn skýrir frá þessu. Fram kemur að hernaðaruppbyggingin á svæðinu tengist þeim miklu náttúruauðlindum sem þar er að finna, sérstaklega olíu og gasi.
Á síðustu árum hafa Rússar enduropnað fjölda fyrrum sovéskra herstöðva á norðurheimskautasvæðinu en þeim var lokað eftir hrun Sovétríkjanna 1991. Í skýrslu Civitas segir að Rússar hafi einnig flutt stóran hluta af kjarnorkuvopnum sínum til svæðisins. „Norðurheimskautasvæðið verður fljótlega landstjórnmálalegur vígvöllur ef Vesturlönd grípa ekki til gagnaðgerða,“ sagði Robert Clark, einn skýrsluhöfunda, þegar skýrslan var kynnt.
Fyrir nokkrum árum opnuðu Rússar Nagurskoje-herstöðina á Franz Jósef Landi en það er nyrsta herstöð heims. Þar er þriggja og hálfs kílómetra löng flugbraut sem mjög þungar sprengjuflugvélar geta nýtt sér.
Leyniþjónusta danska hersins segir að yfirstjórn rússneska hersins hafi lengi rætt um að staðsetja MiG31-orustuþotur í Nagurskoje en þær geta borið hin nýju ofurhljóðfráu Kinsjal-flugskeyti. Þau ná fimmföldum hljóðhraða og geta breytt stefnu sinni á leið að skotmarkinu. Með þessum flugvélum og flugskeytum gætu Rússar til dæmis gert óvænta árás á Thule-herstöðina á Grænlandi.
