Á áttunda tímanum í gærkvöldi var tilkynnt um þjófnað úr verslun í Háaleitis- og Bústaðahverfi. Þar reyndi maður að yfirgefa verslun án þess að greiða fyrir vörur sem hann hafði meðferðis. Þegar starfsmaður reyndi að stöðva hann gerði hann sér lítið fyrir og hrækti í andlit afgreiðslumannsins og hljóp út. Annar starfsmaður elti þjófinn þar til lögreglan handtók hann. Hann var fluttur á lögreglustöð og var látinn laus að skýrslutöku lokinni.

Á sjötta tímanum var ung kona stöðvuð þegar hún fór út úr verslun með ýmsar vörur án þess að greiða fyrir. Er hún sögð hafa gert þetta áður.

Tvær bifreiðar lentu út af Þingvallavegi í kringum miðnætti. Minniháttar meiðsl urðu á fólki í öðru óhappinu. Mikil hálka var á þessum slóðum.

Tveir ökumenn voru kærðir fyrir of hraðan akstur í gær.

Einn ökumaður var kærður fyrir akstur gegn rauðu ljósi og einn fyrir að vera ekki með gild ökuréttindi.

Einn ökumaður var handtekinn í nótt, grunaður um að vera undir áhrifum fíkniefna.

Í Hafnarfirði var tilkynnt um mikla fíkniefnalykt á stigagangi fjölbýlishúss í gærkvöldi. Þar voru höfð afskipti af konu og hald lagt á ætluð fíkniefni.