Nú eru rúmlega níu mánuðir síðan Rússar réðust inn í Úkraínu. Ætlun þeirra var að ná stærstum hluta landsins á sitt vald á skömmum tíma og bola Volodymyr Zelenskyy, forseta, og stjórn hans frá völdum. Eins og kunnugt er hefur þetta ekki gengið eftir og hafa Rússar beðið hvern ósigurinn á fætur öðrum á vígvellinum og á alþjóðlegum vettvangi þar sem þeir standa nú vinafáir og óvinsælir.

Jótlandspósturinn fékk Anders Puck Nielsen, sérfræðing hjá danska varnarmálaskólanum, til að leggja mat á fjóra mikilvæga þætti varðandi stríðið.

Hvað varðar stöðuna á vígvellinum sagði Nielsen að nú sé einhverskonar millibilsástand. Ekki sé ljóst hvað gerist á næstunni en ljóst sé að eitthvað nýtt fari að gerast. Nú sé um stöðubaráttu að ræða þar sem stríðsaðilar reyna að ná frumkvæði og þannig ákveða hvar verður helst barist. Nú þurfi Úkraínumenn að finna nýjan stað sem verði mikilvægasti punktur gagnsóknar þeirra.

Hvað varðar friðarsamninga sagði hann að ekki sé annað að sjá en að það sé mjög erfitt að finna flöt á friðarsamningi núna. Sérstaklega eftir að Rússar „innlimuðu“ stór svæði í Úkraínu. Hann sagði að eftir að það var gert telji hann nánast útilokað að sjá að Rússar muni draga sig frá þessum svæðum í tengslum við friðarviðræður og það sé í raun útilokað að sjá fyrir sér friðarviðræður sem ekki fela í sér brotthvarf Rússa því nú séu það Úkraínumenn sem standa best að vígi hernaðarlega séð. Hann benti einnig á að stríðsaðilar séu langt frá hvor öðrum núna og því sé útlitið ekki gott og síðan sé spurning hvort Pútín eigi möguleika á að semja eða hvort hann sé búinn að mála sig út í horn pólitískt séð af því að það muni reynast honum dýrt, persónulega, að gefa eftir.

Hvað varðar stöðuna á alþjóðavettvangi sagði Nielsen að Rússar eigi ekki marga vini þar núna og svo virðist sem landið einangrist sífellt meira. Hann sagði þetta vera afleiðingu af því að Rússar leggi mikið í stríðsreksturinn og ekki sé að sjá að það sé að skila sér í sigri. Af þeim sökum bíði staða þeirra á alþjóðavettvangi skaða og landið verði sífellt minna aðlaðandi sem samstarfsaðili. Nú sjáist að ríki á borð við Kína, Indland, Rússland, Armenía og Kasakstan séu ekki eins hliðholl Rússum og áður. Mörg þeirra mæli ekki gegn Rússum en þeir fái heldur ekki hlýjan stuðning hjá þeim. Nú þurfi Rússar því að leita til Norður-Kóreu og Írans eftir hjálp.

Nú er vetur skollinn á í Úkraínu og munu snjórinn og kuldinn hafa áhrif á gang stríðsins. Nielsen sagði að það verði áhugavert að sjá hvor stríðsaðilinn komist betur í gegnum veturinn. Hann geti unnið gegn báðum aðilum en það velti á hvernig þeim tekst að nota hermenn sína og hvað þeir ákveða að gera.