Þetta sagði úkraínskur hermaður að nafni Oleksandr Valeriiovych í samtali við The Guardian um það jarðsprengjuhelvíti sem Vladímír Pútín, Rússlandsforseti, lét hermenn sína koma upp í Kherson. Sagði Valeriiovych að Rússar hafi sett jarðsprengjur alls staðar þar sem það var hægt.
Meðfram mörgum þeirra vega sem liggja til borgarinnar Kherson, sem er höfuðborg samnefnd héraðs, eru sérfræðingar búnir að setja upp merki um að jarðsprengjur séu í vegkantinum.
The Guardian segir að svæðið sé eitt stórt jarðsprengjusvæði, hvergi í Úkraínu séu fleiri jarðsprengjur og kannski hvergi í heiminum.
Margir óbreyttir borgarar hafa orðið fyrir því að stíga á jarðsprengjur eða aka á þær.
Úkraínsk yfirvöld segja að Rússar hafi notað svokallaðar „fiðrilda jarðsprengjur“ en notkun þeirra er bönnuð samkvæmt alþjóðasamningum. Þær eru þekktar fyrir að springa og drepa óbreytta borgara löngu eftir að stríðsátökum lýkur. Þær hafa reynst börnum sérstaklega hættulegar því þær líkjast leikföngum.
Yfirmaður úkraínsku sprengjuleitarsveitanna sagði í samtali við The Guardian að á meðan Rússar voru að skipuleggja brotthvarf sitt frá Kherson hafi þeir gefið sér tíma til að grafa jarðsprengjur niður.
