Yevgeny Prigozhin, eigandi málaliðahersveitarinnar Wagner Group og oft nefndur Kokkur Pútíns, hefur fagnað myndbandi þar sem fyrrum meðlimur sveitarinnar er myrtur á miskunnarlausan hátt.
Myndbandið kom upp á yfirborðið um helgina á Grey Zone Telegram-rásinni sem að málaliðar Wagner Group nota iðulega. Þar má sjá fyrrum liðsmann sveitarinnar, Yevgeny Nuzhin, myrtan á hrottalegan hátt með sleggju en Nuzhin hafði yfirgefið Wagner Group og ákveðið að berjast með Úkraínumönnum.
Í myndbandinu segir Nuzhin að þann 4. september síðastliðinn hafi hann gerst liðhlaupi og ákveðið að berjast frekar með Úkraínumönnnum en Wagner Group. Hann hafði gengið að tilboði málaliðasveitarinnar þegar hann sjálfur afplánaði 24 ára dóm fyrir morð í Rússlandi. „Þann 11. nóvember var ég staddur úti á götu í Kiev þegar einhver sló mig í höfuðið svo ég rotaðist. Ég vaknaði síðan í þessum kjallar og þar var mér tilkynnt um að ég yrði dæmdur fyrir gjörðir mínar,“ segir Nuzhin.
Í kjölfarið var hann svo drepinn á hrottalegan hátt með sleggju.
Málaliðasveitin Wagner Group hefur gert mikið af því að fá dæmda glæpamenn í Rússlandi til þess að ganga til liðs við sveitina og berjast gegn Úkraínumönnum. Aðspurður um myndbandið vildi Prigozhin ekki staðfest að meðlimir Wagner Group hafi myrt Nuzhin en hann fagnaði þó örlögum hans.
„Nuzhin sveik fólkið sitt, hann sveik liðsmenn sína og var alveg meðvitaður um það. Hann var ekki tekinn til fanga né gafst hann upp. Hann var svikari,“ sagði Prigozhin samkvæmt frétt CNN.
Nuzhin hafði farið í viðtöl við fjölmiðla vegna þeirrar ákvörðunar sinnar að yfirgefa málstað Rússa og greint frá því hvernig hann var ginntur til þess að berjast með Wagner Group gegn því að verða náðaður af glæpum sínum í Rússlandi. Hann hafði þegar afplánað rúmlega 20 ár af dómi sínum fyrir morð í Nizhny Novgorod og sá fram á að losna úr fangelsi árið 2027.
Nuzhin benti á að hann ætti stóra fjölskyldu í Úkraínu. „Foreldrar mínir búa í vesturhluta Úkraínu. Hvernig getur háð stríð gegn fjölskyldu þinni?“ sagði hann í viðtali.
