Í gær sat Michael Clarke, varnarmálasérfræðingur og fyrrum forstjóri Royal United Services Institute, fyrir svörum hjá Sky News og gat almenningur spurt hann spurninga um stríðið í Úkraínu. Meðal þess sem hann var spurður að, var hvort hann telji að Úkraína muni sigra í stríðinu og hvaða lausn sé líkleg til að binda endi á stríðið.

„Stríðið í Úkraínu verður líklega „barátta kynslóða“ og gæti orðið „eilífðarstríð“ þar til eitthvað breytist varðandi evrópsk öryggismál eða í Rússlandi,“ sagði hann.

Hvað varðar það hvort Úkraína geti sigrað í stríðinu þá sagði Clarke að eins og staðan sé núna sé líklegt að Úkraína geti náð hernaðarlegum yfirburðum og geti hrakið Rússa aftur þangað sem þeir voru fyrir innrásina 24. febrúar. „Munu þeir gera það? Ég veit það ekki en þeir geta gert það,“ sagði hann.

Hann sagði að stríðið í Úkraínu séu „stríð númer tvö“, það fyrsta hafi verið 2014 þegar Rússar lögðu Krím undir sig.

„Tilfinning mín er sú að á næsta ári verði vopnahlé þar sem staða Úkraínumanna verður betri og að þetta vopnahlé verði brothætt og muni bresta og þriðja stríðið brjótast út og síðan vopnahlé og síðan fjórða stríðið,“ sagði hann og bætti við að hér væri um tilvistarbaráttu að ræða því rússneskir ráðamenn telji að Úkraína eigi engan rétt á að vera til og þeir muni ekki skipta um skoðun ef horft sé til skamms tíma. „Þetta er eins og kynslóðabarátta. Segjum að hún vari í 30, 40 eða 50 ár.“

„Geta Úkraínumenn endurheimt land sitt? Já, en þeir verða að búa við vopnaðan frið með nágranna sem er tíu sinnum stærri og vill þeim ekkert gott. Ef þriðja stríðið brýst út, þá verður það líklega erfiðara en það númer tvö því bæði ríkin munu hafa vopnbúist af krafti. Þetta er því upphafið á algjörlega nýju tímabili í evrópskum öryggismálum,“ sagði hann.