Talið er að minnsta kosti 1.300 einstaklingarr hafi verið handteknir í mótmælum í Rússlandi síðan að Vladimir Pútín, Rússlandsforseti, tilkynnti að hann hefði fyrirskipað um herkvaðningu sem nær til þeirra sem eru í varaliði rússneska hersins.

CNN greinir frá  að sumir þeirra handteknu hafi umsvifalaust verið skráðir í rússneska herinn. Að öðrum kosti yrðu þeir ákærðir en viðurlög við því að gangast ekki við herkvaðningu er 15 ára fangelsi.

Mótmælt var í að minnsta kosti 38 borgum í Rússlandi en mótmælin voru kröftugust í Moskvu og St. Pétursborg. Yfir 500 manns voru teknir höndum hvorri borg.

Þá voru níu blaðamenn handteknir sem og 33 einstaklingar undir lögaldri.

Fréttstofa Sky greinir frá að fjölmargir Rússar sem búast megi við herkvaðningu freisti þess nú að flýja land áður en til þess kemur. Verð á flugmiðum hefur hækkað gríðarlega og víða má sjá langar biðraðir bíla við landamæri Rússlands, sérstaklega til Finnlands og Georgíu.

Sanna Marin, forsætisráðherra Finnlands, sagði á fréttamannafundi í gær að finnsk yfirvöld myndu freista þess setja hömlur á för Rússa til landsins, sem eru ein af þeim fáu sem enn eru opin fyrir rússneska ríkisborgara.

Önnur lönd sem hafa landamæri að Rússlandi, eins og Litháen, Lettland og Eistland, hafa þegar lokað fyrir ferðalög rússneskra ríkisborgara.

Yfirvöld í Kreml segja þó að mikil stuðningur sé við aðgerðirnar í Rússlandi og ekkert sé hæft í þeim sögusögnum að mikill flótti sé frá landinu.