Starfsmannafélag Sinfóníuhljómsveitar Íslands hefur boðað til félagsfundar næstkomandi mánudag, þann 19. september, þar sem fundarefnið er vantraustsyfirlýsing gagnvart framkvæmdastjóra og stjórn Sinfóníuhljómsveitarinnar. Stefnt er að því að kjósa um tillöguna á fundinum.
Vantraustsyfirlýsingin hefur verið til umræðu síðan í sumar eftir að ákveðnum starfsmanni við sveitina var sagt upp en hann hafði áður verið settur í leyfi vegna ásakana um áreitni og ofbeldi í garð samstarfsmanns. DV fjallaði um það í febrúar.
Sjá einnig: Framkvæmdastjóri Sinfóníuhljómsveitarinnar tjáir sig ekki um meinta áreitni hljómsveitarmeðlims
Starfsmaðurinn sem sagt var upp hafði einnig verið sakaður um að brjóta kynferðislega gegn börnum en hann var ekki ákærður. Vitneskja um þessar ásakanir hafa lengi verið til staðar hjá framkvæmdastjóra og stjórn Sinfóníuhljómsveitarinnar.
Mikil reiði og óánægja er með uppsögnina hjá hluta starfsfólks Sinfóníuhljómsveitarinnar. Samkvæmt heimildum DV telur Félag íslenskra hljómlistarmanna að uppsögnin sé ólögmæt og segist starfsfólk óttast um starfsöryggi sitt í kjölfar hennar.
Þá hefur hluti starfsfólks einnig krafist þess formlega að uppsögnin verði dregin til baka. Ýmsum finnst að stjórn Sinfóníuhljómsveitarinnar hafi tekið sér dómaravald með uppsögninni.
Samkvæmt heimildum DV hyggst starfsmaðurinn fara í mál við Sinfóníuhljómsveitina vegna uppsagnarinnar.
Nýr formaður hefur tekið við starfsmannafélagi Sinfóníuhljómsveitarinnar en sá sem var formaður þar á undan sagði af sér vegna álags í tengslum við mál starfsmannsins sem sagt var upp.
Hluti starfsmannahópsins telur að stjórn Sinfóníuhljómsveitarinnar hafi tekið ákvörðun um uppsögnina út frá þeim „ímyndarskaða“ sem hljómsveitin gæti orðið fyrir ef ásakanir á hendur starfsmanninum um barnaníð og annað ofbeldi yrðu opinberar.
Starfsmaðurinn fyrrverandi var á sínum tíma kærður fyrir að brjóta kynferðislega gegn börnum. Í málinu voru lagðar fram frásagnir barnanna sjálfra úr viðtölum í Barnahúsi og samræmdust frásagnirnar kynferðislegri misnotkun að mati meðferðaraðila. Vegna þess hversu langur tími var liðinn síðan meint brot áttu sér stað töldu bæði héraðssaksóknari og ríkissaksóknari að málið væri ólíklegt til sakfellis, og maðurinn ekki ákærður.
Ljóst er að til mikils er að vinna þegar kemur að því að viðhalda góðri ímynd Sinfóníuhljómsveitarinnar en hún er „þjóðarhljómsveit“ og „ein af grunnstoðum íslenskrar menningar,“ eins og segir í nýjasta stefnumótunarriti hennar.
Þar segir einnig í kafla um sölu- og markaðsmál: „Styrkja þarf ímynd hennar enn frekar sem framúrskarandi sinfóníuhljómsveitar og stolts íslensku þjóðarinnar.“
Sinfóníuhljómsveit Íslands er sjálfstæð opinber stofnun og greiðir ríkissjóður 82% af rekstrarkostnaði hennar en Borgarsjóður Reykjavíkur 18%.
DV greindi frá því í marsmánuði að annar starfsmaður en hér er fjallað um hafi sagt upp hjá Sinfóníuhljómsveitinni í skugga ásakana um kynferðisofbeldi.
Sjá einnig: Tveir starfsmenn Sinfóníuhljómsveitarinnar stignir til hliðar vegna ásakana um áreitni og ofbeldi
