Vladímír Pútín, Rússlandsforseti, sæmdi nýlega Ivan Neparatov rússnesku hugrekkisorðunni fyrir frammistöðu hans á vígvellinum í Úkraínu. Neparatov sat í fangelsi í Rússlandi þar til nýlega, afplánaði dóm fyrir fimm morð. Hann var einnig leiðtogi glæpagengis.

Hann var látinn laus til að hann gæti gengið til liðs við Wagnerhópinn og barist með honum í Úkraínu. Wagnerhópurinn er einkafyrirtæki, rekið af góðvini Pútíns, sem útvegar rússneskum stjórnvöldum málaliða þegar þörf krefur. Rússneskir ráðamenn hafa ítrekað neitað að eiga í samstarfi við Wagnerhópinn og reyna að telja umheiminum trú um að það sé helber tilviljun að málaliðar frá hópnum birtast oft þar sem Rússar láta að sér kveða. Hópurinn hefur verið sakaður um grimmdarleg ofbeldisverk í Afríku þar sem hann hefur verið að störfum síðustu misseri.

Neparatov er einn af mörg þúsund föngum sem hafa verið látnir lausir gegn því að ganga til liðs við Wagnerhópinn. Hann hafði afplánað helminginn af 25 ára dómi sem hann hlaut fyrir fimm morð.

Daily Mail segir að hann hafi fallið fljótlega eftir komuna til Úkraínu.

Pútín hefur verið sagður bjóða dæmdum mönnum lausn úr fangelsi gegn því að þeir fari til Úkraínu að berjast. Fangarnir eru sagðir vera „fallbyssufóður“ og að dánartíðnin í þeirra röðum sé mjög há.

Neparatov afplánaði dóm sinn í Pskovhéraðinu. Hann og átta meðlimir glæpagengis hans afplánuðu dóma þar fyrir morð og hryðjuverk. Þeir höfðu klæðst lögreglubúningum og borið grímur þegar þeir frömdu ódæðisverk sín. Meðal annars kyrktu þeir konu og stungu karlmann 88 sinnum.