Sálfræðingurinn Arnar Sverrisson hefur verið boðaður í yfirheyrslu vegna rannsóknar á meintri hatursorðræðu. Frá þessu greinir Arnar í færslu á Facebook-síðu sinni.

„Ég fékk óvænta hringingu frá lögreglunni í morgun. Prúður og hálfvandræðalegur lögreglumaður tjáði mér, að ég væri boðaður í viðtal vegna hatursorðræðu í tveim greinum, sem ég skrifaði í Vísi fyrir tveim árum síðan um kynskipti. Skrifaði reyndar um kynskipti í Morgunblaðið einnig, en kærandi minn, Tanja Vigdisdottir, virðist ekki hafa séð hatursorðræðu í henni. Það fylgdi sögunni, að lögreglan hefði í fyrstu hafnað rannsókn á kæruefninu, en Ríkislögreglustjóri nú fyrirskipað, að rannsókn skyldi fara fram. Því er ég boðaður í yfirheyrslu,“ skrifar Arnar.

Eins og DV greindi frá á sínu tíma reis upp hávær mótmælaalda vegna greinar sem Arnar skrifaði og birtist á Vísi þann 11. ágúst 2020 undir fyrirsögninni: „Kynröskun stúlkna. Hin nýja „móðursýki“. Trans Ísland, stuðnings- og baráttusamtök fyrir trans fólk á Íslandi, gaf út yfirlýsingu þess efnis að greinin væri uppfull af rangfærslum, fordómum og vanþekkingu og það jaðraði við að um hatursorðræðu væri að ræða.

Þá gaf Trans-treymi Landspítalans einnig út yfirlýsingu vegna málsins þar sem grein Arnars var fordæmd.

Í færslu Arnars er því haldið fram að kærandi í málinu sé Tanja Vigdísardóttir. Hún skrifaði andsvar við grein Arnars þar sem hún sagðist ekki geta fyrirgefið honum „látalætin, blammeringarnar og hatrið sem þú ert að ausa yfir fólk.“ Þeirri grein svaraði Arnar svo nokkrum dögum síðar. Þar vísaði hann gagnrýninni til föðurhúsanna og sagði gagnrýnendur sína kjósa að upphefja sjálfa sig með því að lítilsvirða sig.