Næstkomandi fimmtudag verður kveðinn upp dómur í Héraðdómi Reykjaness yfir Brynjari Joensen Creed, 52 ára Vopnfirðingi, fyrir kynferðisbrot gegn fimm ólögráða stúlkum. Meint brot varða allt frá rafrænni áreitni upp í nauðganir.
Samkvæmt ákæru er Brynjar sakaður um alls 17 brot gegn þessum fimm stúlkum. Hins vegar eru margfalt fleiri meint brot Brynjars til rannsóknar hjá Lögreglunni á Suðurnesjum og hann á von á fleiri ákærum. Um gæti verið að ræða eitt umfangsmesta kynferðisbrotamál sem komið hefur upp á Íslandi. Tugir ólögráðna stúlkna hafa verið teknar í viðtal í Barnahúsi vegna rannsóknar málsins og talið er að Brynjar hafi átt rafræn samskipti við yfir 200 ólögráða stúlkur.
Lögreglan á Suðurnesjum hefur ekki viljað tjá sig um málið við DV þegar eftir því hefur verið leitað. Þó er rannsókn lokið hvað varðar þau 17 brot sem Brynjar er ákærður fyrir og ljóst að margt hefur komið fram um rannsóknina í aðalmeðferð í málinu sem lauk fyrir lok apríl, en þinghald var lokað.
Engu að síður er ljóst af ákæru og upplýsingum sem DV hefur komist yfir um málið að Brynjar er talinn hafa spilað nokkurs konar tölvuleik með þolendur sína þar sem sífellt grófari athafnir hafi verið verðlaunaðar með dýrari verðlaunum. Má í raun skipta þessu rafræna atferli upp í fimm borð, með líkingu við getustig í tölvuleikjum. Þannig hafi fyrsta borð verið að fá stúlku til að brosa eða hlæja í myndavél, borð tvö að senda mynd af buxnaklæddum afturenda og e.t.v. slá í afturendann, borð þrjú að hrista brjóst og senda mynd af næxbuxnaklæddum rassi, borð fjögur nakinn rass, brjóstaskora eða fullnekt; og lokaborðið er fullnæging í myndskeiði.
Brynjar setti þetta upp sem leik og í síma hans fundust skjáskot af borðunum fimm og skilaboð á milli hans og ótalmargra stúlkna sem hann reyndi að fá til að spila leikinn. Nær allar þær stúlkur sem Brynjar á enn eftir að ákæra fyrir að hafa brotið gegn spiluðu leikinm við hann.
Brynjar er sagður hafa greitt stúlkunum fyrir þessar athafnir og myndskeiðasendingar með rafrettum, rafrettuáfyllingarvökva, áfengi, undirfötum og kynlífshjálpartækjum.
Þess má geta að í ákæru er Brynjar meðal annars sagður hafa gerst brotlegur við lög um rafettur og áfyllingar fyrir rafrettur, sem og við ákvæði áfengislaga. Einnig er hann sakaður um brot á 99. grein barnaverndarlaga, þar sem segir: „Hver sá sem hvetur barn til lögbrota, áfengis- eða fíkniefnaneyslu eða annarrar hegðunar sem stefnir heilsu barnsins og þroska eða lífi og heilsu annarra í alvarlega hættu skal sæta sektum eða fangelsi allt að fjórum árum.“
Sem fyrr segir verður dómur kveðinn upp í málinu gegn Brynjari í Héraðsdómi Reykjaness næstkomandi fimmtudag.
Fréttin hefur verið uppfærð.
