Þetta sagði Vladímír Pútín, Rússlandsforseti, á ríkisstjórnarfundi i fyrradag en honum var sjónvarpað í Rússlandi. Orð hans skutu sumum skelk í bringu eins og DV skýrði frá í gær.
Flemming Splidsboel, sérfræðingur hjá Dansk Institut for International Studier, sagði í samtali við TV2 að þessi ummæli Pútín sé mikil stigmögnun á deilum Rússlands við Úkraínu og Vesturlönd. „Hann talar um föðurlandssvikara og fólk sem skilur ekki rússnesku þjóðarsálina. Þetta er stigmögnun og virðist gróft. Orðum Pútín var aðallega beint gegn því fólki sem sér Vesturlönd sem griðastað og lofsamar Vesturlönd,“ sagði Splidsboel.
Hann benti einnig á að Pútín hafi nýtt tækifærið til að beina orðum sínum til Rússa sem gætu haft tilhneigingu til að hafa efasemdir um hernaðinn í Úkraínu: „Þetta var aðvörun um að þörf sé á samstöðu og ef maður skilji ekki alvöruna sé maður ekki sannur Rússi.“
Charlotte Flindt Pedersen, forstjóri samtakanna Det Udenrigspolitiske Selskab, sagði að líta verði á ummæli Pútín sem lið í því að stöðva efasemdir Rússa um stríðið.
Hún sagði að fram að þessu hafi komið fram andstaða meðal háskólakennara og námsmanna sem hafi skrifað undir yfirlýsingar gegn stríðinu og einnig hafi bloggarar og listamenn lýst yfir óánægju sinni með það. Þá er skemmst að minnast þess að fréttakona ein truflaði beina útsendingu á ríkissjónvarpsstöð í vikunni og sýndi skilti sem á stóð: „Stöðvið stríðið.“
Hann vill drepa þá andstöðu sem er byrjuð að sýna sig sagði Pedersen. Hún sagði að það hefði verið skelfilegt að heyra Pútín tala um eðlilega hreinsun meðal þeirra Rússa sem eru á móti stríðinu: „Það rann kalt vatn niður bakið á mér. Rússland á sér fortíð með Stalín þar sem mjög margir urðu hreinsunum að bráð og enn er ekki búið að ljúka uppgjöri við Stalínstímann. Þetta er mjög gróf orðanotkun um þá sem hugsa öðruvísi þegar hann segir: „Við skyrpum þeim út eins og flugum.“ Það er óhugnanlegt.“
