Pútín varaði rússneska ríkisborgara, sem styðja Vesturlönd, við og sagði að innrásin í Úkraínu gangi „algjörlega eftir áætlun“. Það liggur hins vegar fyrir að hernaður Rússar gengur alls ekki eftir áætlun. Sókn hersins miðar lítið, hann hefur orðið fyrir miklu manntjóni og misst mikið af hernaðartólum. Þessum upplýsingum er þó haldið frá rússnesku þjóðinni sem fær að mestu bara fréttir matreiddar af ráðamönnum í Kreml.
Pútín sendi frá sér harðorða viðvörun á fundinum í gær til „landráðamanna“ og var hún mun harðari en fyrri viðvaranir hans: „Allir, og þá sérstaklega Rússar, geta alltaf gert greinarmun á sönnum föðurlandsvini og úrhraki og föðurlandssvikurum. Þeir munu skyrpa þeim út eins og litlu skordýri sem hefur flogið inn í munn þeirra fyrir tilviljun.“
Hann sagði að Vesturlönd reyni að efna til uppreisnar meðal almennings í Rússland og noti Úkraínu sem stökkbretti til sóknar gegn Rússum. „Það er eitt markmið, að eyðileggja Rússland,“ sagði hann á fundinum.
Hann sagði að Vesturlönd hafi í hyggju að nota rússneska ríkisborgara sem „fimmtu herdeildina“ en það hugtak er notað yfir ríkisborgara sem snúast gegn eigin landi í stríði og berjast fyrir óvinina.
„Vesturlönd munu að sjálfsögðu veðja á fimmtu herdeildina, á föðurlandssvikara. Á þá sem græða peninga hér en búa annars staðar. Ekki landfræðilega, heldur í höfði sínu. Í þrælslegum hugsanagangi sínum. Ég er sannfærður um að eðlileg og nauðsynleg hreinsun á samfélaginu muni styrkja samfélag okkar og samstöðu,“ sagði hann.
Margir sérfræðingar í málefnum Rússlands segja þessi ummæli hans óhugnanleg. Andrei Kolsenikov, stjórnmálaskýrandi í Moskvu, sagði að með orðum sínum skipti Pútín Rússum í tvo hópa, hreina og óhreina.
