Fréttablaðið skýrir frá þessu. Fram kemur að heimsfaraldurinn, skortur á hráefnum í lyf og lengri tímalínur fyrir framleiðslu og afhendingu hafi orðið til þess að stjórnvöld fylgist grannt með hvort ástæða sé til að óttast lyfjaskort hér á landi. „Það hafa, sem tengist Covid, verið áhyggjur á Íslandi af mögulegum lyfjaskorti. Það þekkja allir sem eru í innflutningi að tímalínur hafa lengst. Við könnumst enn ekki við lyfjaskort, en við erum mjög vakandi fyrir ástandinu eins og aðrar þjóðir í Evrópu,“ er haft eftir Rúnu Hauksdóttur Hvannberg, forstjóra Lyfjastofnunar.
Sérstakt teymi um lyfjaskort er starfrækt hér og er það í beinu sambandi við heildsala að sögn Rúnu.
Mjög mikil áhersla hefur verið lögð á framleiðslu bóluefna síðasta árið og er því mikið álag á lyfjaframleiðendum að sögn Rúnu.
Íslenski lyfjamarkaðurinn er mjög lítill og getur það verið bæði kostur og galli að sögn Rúnu. Vegna fámennisins sé Ísland ekki efst á lista framleiðenda en á móti þessu vegi að ekki þurfi mikið magn.
Óskar Reykdalsson, forstjóri Heilsugæslu höfuðborgarsvæðisins, sagði að það hafi færst í vöxt að læknar þurfi að breyta tilvísunum sínum og ávísa öðru lyfi en til stóð en hingað til hafi tekist að bjarga málum ágætlega með því að skipta um lyf. Hann sagðist ekki vita til þess að læknar hafi neyðst til að ávísa lakari lyfjum en ella vegna lyfjaskorts. „Ég ítreka að ástandið hefur ekki hingað til haft alvarleg áhrif. En þetta getur þýtt smávinnu,“ er haft eftir honum.
