Morgunblaðið skýrir frá þessu. Segist blaðið hafa heimildir fyrir að þungt hljóð sé í flugmönnum vegna þessa. Haft er eftir Birgi Jónssyni, forstjóra Play, að hugmyndin að þessu hafi ekki komið frá stjórnendum félagsins. „Ég var nú reyndar ekki á fundinum sjálfur en það er mikilvægt að árétta að þessi hugmynd kemur ekki frá stjórninni heldur vaknar hún hjá hópnum,“ er haft eftir honum.
Hann sagði að ekki væri verið að neyða starfsmenn til að lækka starfshlutfall sitt en með boðinu sé verið að reyna að tryggja að hægt verði að fastráða fleiri starfsmenn í vetur og forða því að fólk verði atvinnulaust. „Í stað þess að þeir sem eru bara með ráðningarsamning út sumarið myndu detta út í haust og koma svo kannski aftur inn í vor var sú hugmynd lögð fram að þeir starfsmenn sem gætu og vildu, tækju á sig lækkun á starfshlutfalli,“ er haft eftir honum.
Hann sagði að það væri víðs fjarri því að félagið væri að draga úr umsvifum sínum því það stefni á Bandaríkjamarkað eftir áramót og muni þá þurfa allan tiltækan mannskap til að mæta aukinni eftirspurn. „Allt sem við erum að gera núna er bara upphitun fyrir næsta vor og erum við að þjálfa áhöfnina fyrir Bandaríkin. Fólk vissi það alveg þegar það byrjaði hjá okkur í sumar að við þurfum að vera fleiri á næstu mánuðum en flugáætlunin gerir ráð fyrir eins og hún er núna,“ sagði hann.
52 flugliðar eru í fullu starfi hjá Play, af þeim eru 16 fastráðnir. 26 flugmenn eru hjá félaginu og eru þeir allir fastráðnir í fullu starfi.
