32 ára gamall pólskur karlmaður var handtekinn hér á landi um páskana en lýst hefur verið eftir honum um allan heim af norskum yfirvöldum vegna mannráns. RÚV greinir frá.
Maðurinn bíður nú eftir því að verða framseldur til Noregs en hann hefur fallist á það. Norska dómsmálaráðuneytið sendi fyrirspurn til Íslands í síðasta mánuði þar sem óskað var eftir upplýsingum um lög og reglur varðandi framsal.
Maðurinn er grunaður um að hafa ráðist á auðkýfinginn Reidar Olsen og rænt hann, sem og að svipta Petter Slengesol frelsi sínu. Petter varð fyrir gríðarlegu ofbeldi meðan frelsissviptingin stóð yfir. Tveir menn hafa verið dæmdir fyrir málið en annar þeirra er bróðir þess sem handtekinn var hér á landi.