Mannabein fundust í fjöru á Vopnafirði í dag. Vísir greinir frá og segir lögregluna á Austurlandi hafa staðfest þetta í samtali við fréttastofu Vísis.
Tilkynning barst lögreglu snemma í morgun og virðist beinunum hafa skolað á land. Málið er í rannsókn en ekki leikur grunur á að nokkuð saknæmt hafi átt sér stað. Kennsl hafa ekki verið borin á beinin og má vænta tilkynningu lögreglu vegna málsins síðar í dag.
Tilkynning hefur borist frá lögreglunni á Austurlandi. Hún er svohljóðandi:
„Um klukkan hálf ellefu í morgun barst lögreglu tilkynning um bein í fjöru við Vopnafjörð. Talið var að um mannabein væri að ræða. Lögregla hefur síðan verið að störfum á vettvangi við vettvangsrannsókn.
Staðfest hefur verið að um líkamsleifar er að ræða og talið að þær hafi legið í sjó í nokkurn tíma. Þær munu nú sendar til frekari rannsóknar þar sem kennslanefnd Ríkislögreglustjóra freistar þess að staðfesta kennsl þeirra.
Ekki leikur grunur á að líkfundur þessi tengist saknæmu atviki“
