Morgunblaðið skýrir frá þessu í dag. Haft er eftir Páli að ef kvikan hafi þrýsting og aðstæður til að koma upp á yfirborðið þá geti hún brotist þá leið sem eftir er, sem er um einn kílómetri, á skömmum tíma. „Við erum þegar búin að sjá aðdragandann. Hann er orðinn langur en getur líka orðið lengri,“ sagði Páll sem mynnti á að Holuhraunsgangurinn hafi lengst í tvær vikur áður en kvika kom upp á yfirborðið.
Ef svo fer að eldgos brýst út við Fagradalsfjall er líklegt að um sprungugos verði að ræða en þau geta verið kraftmikil í upphafi en botninn dettur oft fljótlega úr kraftinum eins og gerðist í Kröflugosunum. Sum þeirra byrjuðu á löngum sprungum og mikið hraun flæddi á stuttum tíma en næsta dag var allur kraftur úr þeim.
Syðri endi kvikugangsins á Reykjanesskaga hefur færst sunnar og í gær var hann undir Fagradalsfjalli. Gangurinn er um 1 til 2 metrar á þykkt að sögn Páls. Talið er að 10 til 20 rúmmetrar af kviku streymi inn í hann á sekúndu og því þenst hann út og þykknar.
Páll sagði að talið væri að heildarrúmmálið sé orðið 10 til 20 milljónir rúmmetra sem þyki ekki neitt rosalega mikið. Ef allt þetta magn kæmi upp á yfirborðið væri það eins og gosið á Fimmvörðuhálsi sem var lítið gos.
