Fjölmiðlamaðurinn Larry King lést á Cedars-Sinai sjúkrahúsinu í Los Angeles í morgun, 87 ára að aldri. Greint var frá andláti Larry á Twitter-síðu hans í dag.

Larry starfaði við fjölmiðlun í 63 ár en hann var einn þekktasti þáttastjórnandi allra tíma. Á ferli sínum vann Larry fjölmörg verðlaun fyrir vinnu sína, til að mynda Peabody-verðlaun og Emmy-verðlaun.

„Larry horfði alltaf á fólkið sem hann ræddi við sem raunverulegu stjörnurnar í þáttunum sínum,“ segir í tilkynningunni sem birt var á Twitter.

„Hann leit á sjálfan sig sem hlutlausan miðlara milli gestsins og áhorfenda. Hvort sem hann var að tala við forseta Bandaríkjanna, erlenda ráðamenn, stjörnur, umdeilt fólk eða meðalmanninn, vildi Larry spyrja spurninga sem voru stuttar, hnitmiðaðar og einfaldar. Hann trúði að þannig spurningar gæfu bestu svörin og hann hafði ekki rangt fyrir sér þar.“

https://twitter.com/kingsthings/status/1352960673978880000/photo/2