Fréttablaðið skýrir frá þessu í dag. Fram kemur að frá árinu 1900 hafi jöklarnir minnkað um 15% eða sem nemur 2.200 ferkílómetrum. Frá síðustu aldamótum hefur hraðinn á undanhaldi jöklanna aukist og er það nú orðið 800 ferkílómetrar.
„Það er ekki lengur nokkur vafi að þessar breytingar eru að gerast og að þær eru af mannavöldum,“ sagði Guðfinna í viðtali á Fréttavakt Hringbrautar í gærkvöldi.
Jöklar þekja nú um 11% landsins. Þar af þekur Vatnajökull 8% landsins en hann tapar nú 4 ferkílómetrum af frera sínum árlega og að auki þynnist hann um hálfan metra.
Fram til ársins 1900 höfðu jöklarnir verið í sókn og hækkað í fimm aldir. Þeir byrjuðu síðan að hopa í upphafi tuttugustu aldarinnar. Þetta gerðist nokkuð hratt fram til 1950 en þá hægðist á þessu í tvo áratugi og frá 1970 til 1995 sóttu þeir lítillega fram en síðan hefur þróunin verið á einn veg.
„Þetta er mikið, þetta eru margir fótboltavellir á hverju ári. Þeir eru að bregðast við hlýrra loftslagi, þeir eru búnir til við kaldari aðstæður og nú þegar hlýnar þurfa þeir að bregðast við,“ sagði Guðfinna um þessa þróun.
Öruggt er talið að ásýnd landsins muni breytast á öldinni vegna þess hversu mikið jöklarnir hopa. Samhliða hlýnandi veðri mun afrennsli jöklanna væntanlega aukast mikið en nú koma um 20% árrennslis úr jöklum. Um leið og jöklarnir hopa mun land rísa, einkum á suðausturhluta landsins, þar sem minna farg hvílir á því. Að auki má reikna með hækkandi sjávarstöðu.
„Þessar breytingar eru óvenjulegar því þær eru mjög hraðar og eru klárlega af mannavöldum. Fyrri breytingar hafa verið af náttúrulegum loftslagsbreytingum sem verða vegna afstöðu jarðar og sólar sem er algjörlega náttúrulegt. Það eru bara 150 ár síðan við fórum að brenna kolefniseldsneyti og leiða svona mikinn koltvísýring út í loftið sem hefur greinileg áhrif til hlýnunar andrúmsloftsins,“ sagði Guðfinna.
