Maðurinn sem handtekinn var á Spáni í október og framseldur til Danmerkur vegna ákæru um að hafa nauðgað dóttur sinni á Selfossi og í Danmörku heitir Markús Betúel Jósefsson og er 51 árs gamall. Hann er mjólkurfræðingur að mennt.

DV sagði frá ákærunni í gær.

Markús var undanfarin ár búsettur á Spáni og í Danmörku og er dóttir hans danskur ríkisborgari, að því er fram kemur í frétt Ekstra Bladet um málið í gær. Dóttir mannsins er nú tvítug.

Málið var upphaflega kært til lögreglu árið 2018 en þá var Markús fluttur til Spánar. Að rannsókn lokinni var gefin út handtökuskipun og gæsluvarðhaldsúrskurður yfir honum kveðinn upp að honum fjarstöddum. Í október í fyrra var Markús svo loks handtekinn í Benissa á Alicante á Spáni og framseldur til Danmerkur.

Í svari Sveins Guðmarssonar, upplýsingafulltrúa utanríkisráðuneytisins, við fyrirspurn DV segir að borgaraþjónusta ráðuneytisins hafi verið látin vita af handtökunni og haft málið á sínu borði í fyrstu, en að ekki hafi verið óskað eftir frekari aðkomu hennar.

Í ákæru sem DV hefur undir höndum og gefin var út af saksóknurum í Danmörku, er manninum gefið að sök að hafa ítrekað nauðgað dóttur sinni á Íslandi og í Hesselager á austurströnd Fjóns, um 50 kílómetrum suðaustan við Óðinsvé.

Rétt er að vara viðkvæma við lýsingunum sem koma fram í ákærunni og vísað er til hér að neðan.

Maðurinn er ákærður fyrir að hafa á tímabilinu 2006-2010 í Hesselager, í skógi á Íslandi, í bíl á Íslandi og á óþekktum stað á Íslandi, á eða nálægt Selfossi, haft samfarir eða önnur kynferðismök við líffræðilega dóttur sína. Þá er hann sagður hafa snert dóttur sína, kysst líkama hennar og látið hana fróað sér.

Að auki er hann ákærður fyrir að hafa lamið dóttur sína, sparkað ítrekað í hana, slegið hana með skeiðum og öðrum verkfærum, ýtt henni einu sinni upp við tré og kastað henni í jörðina.

Réttarhöldin hefjast 2. júní og verða opin nema þegar dóttir mannsins gefur skýrslu. Saksóknarar krefjast þess að maðurinn verði dæmdur í að minnsta kosti fjögurra ára fangelsi fyrir brot sín. Búist er við að dómur liggi fyrir 17. júní næstkomandi.