19 ára stelpa var ein þeirra 10 þúsund Íslendinga sem lögðu leið sína í Laugardalshöllina í dag til að fá bólusetningu. Stelpan er ekki í neinum sérstökum áhættuhóp en hún var boðuð í bólusetningu þar sem hún vinnur í grunnskóla.
Alla jafna eru bólusetningar ekki tíðindamiklar en það var ekki raunin hjá ungu konuna í dag. Þegar hún hafði fengið sprautuna af bóluefni frá Pfizer leið yfir hana með þeim afleiðingum að hún skall á hörðu gólfinu.
„Ég bara fæ sprautuna og þetta var náttúrulega allt í lagi, þetta var ekki það vont. Svo fæ ég ógeðslega mikla klígju, svo segi ég eitthvað: „Fokk! Mig svimar smá“ og halla mér svo fram,“ segir konan í samtali við DV um atvikið. „Svo vakna ég við það að það er fullt af einhverju liði að spyrja mig hvað ég heiti, hvar ég væri og á hvaða bíómynd ég hafi verið á.“
Þrátt fyrir að það hafi liðið yfir hana í bólusetningunni var konan nokkuð spræk þegar blaðamaður náði tali af henni í dag. Hún var þó ekki alveg laus við alla áverka. „Ég náttúrulega lenti á hausnum þannig ég er með kúlu og hausverk en annars er ég góð,“ segir hún.
Hún er ekki viss hvers vegna það leið yfir hana en hún segist hafa verið stressuð fyrir því að fá sprautuna. „Já, ég er alltaf alveg stressuð. Ég var smá stressuð fyrir þessu,“ segir hún en hvetur þó alla sem eru boðaðir í bólusetningu til að láta gera það.
