Kveðinn var upp dómur í Héraðsdómi Suðurlands  í gær yfir manni vegna atvika honum tengdum í Vestmannaeyjum árin 2019 og 2020.

Ákæran var í þremur liðum. Í fyrsta lagi var manninum gefið að sök að hafa veist að manni við Áshamar í Vestmannaeyjum, aðfaranótt fimmtudagsins 2. maí 2019 og slegið hann í andlitið með þeim afleiðingum að hann hlaut mar við vinstra auga.

Í öðru lagi var hann ákærður fyrir að hafa þriðjudagskvöldið 17. desember 2019 stolið yfirhöfnum úr fatahengi skemmtistaðar eða veitingastaðar.

Í þriðja lagi var hann sakaður um að hafa ráðist á sama manninn og um getur í fyrsta ákæruliðnum, síðdegis miðvikudaginn 11. mars 2020, einnig að Áshamri, og slegið hann í andlitið.

Maðurinn mætti ekki við þingfestingu málsins og var ákveðið að dómur yrði kveðinn upp yfir honum að honum fjarstöddum.

Hann er með töluverðan afbrotaferil að baki sem nær allt aftur til upphafsára þessarar aldar, líkamsárásir, brot gegn valdstjórninni, umferðar- og fíkniefnalagabrot, og fleira.

Hann var fundinn sekur um alla ákæruliði og dæmdur í sex mánaða fangelsi, þar af þrjá mánuði skilorðsbundið. Þá var hann dæmdur til að greiða þolanda líkamsárásanna 400 þúsund krónur í miskabætur.