Í gær greindust sex innanlands með COVID-19 og þar af var einn utan sóttkvíar. Smitrakningarteymið er þessa stundina að rekja þetta eina smit og heldur sú rakning áfram í dag.
Þetta kemur fram í tilkynningu frá Almannavörnum og þar segir jafnframt:
„Rakningu er lokið hjá öllum öðrum. Þessa stundina eru um 1500 manns í sóttkví, eins og við er að búast þegar einstaklingur greinist utan sóttkvíar þá mun bætast í þennan hóp í dag. Ekki er hægt að segja til um á þessari stundu hve margir það eru. Einn einstaklingur greindist í gær með COVID-19 á landamærunum.“
DV ræddi stuttlega við Hjördísi Guðmundsdóttur, samskiptastjóra Almannavarna, og spurði hvort það væru vonbrigði að aðili hefði greinst utan sóttkvíar, en á föstudag greindist enginn utan sóttkvíar: „Það var bara viðbúið. Þetta er ekki búið.“
Varðandi það hvort sóttvarnaaðilar telji sig hafa samt náð utan um smitbylgjuna segir Hjördís að það hafi tekist að rekja öll smit til þessa en það sé viðbúið að áfram greinist smit utan sóttkvíar. „Það er viðbúið að þetta gerist næstu daga. Þetta er alls ekki búið þó að síðustu dagar hafi óneitanlega litið vel út.“