Héraðsdómur Reykjavíkur dæmdi í dag mann í þrjátíu daga fangelsi, skilorðsbundið til tveggja ára, fyrir líkamsárás sem átti sér stað á krá í miðbæ Reykjavíkur. Nánar tiltekið á Ölstofu Kormáks og Skjaldar, en þar á hann að hafa bitið dyravörð í upphandlegginn, sem ætlaði að vísa honum út af staðnum.

Ákærði neitaði sök í málinu og sagðist hafa „rétt nartað í“ dyravörðinn. Hann sagðist hafa verið gestur á staðnum og hafa drukkið fimm bjóra og verið „pínulítið ölvaður“. Einhver gestur hafi kvartað yfir nærveru hans sem varð til þess að hann færði sig um set, og kom sér fyrir á öðrum stað á kránni.

Samkvæmt dyravörðunum bárust endurteknar kvartanir vegna mannsins, en þegar hann hafi verið beðinn um að yfirgefa staðinn hafi hann verið sofandi. Þegar þeir báðu hann um að fara hafi hann snöggreiðst.

Þessu neitar ákærði, sem segist hafa beðið um útskýringu á því að vísa ætti honum út af kránni, en ekki fengið skýr svör. Svo hafi það verið dyravörðurinn sem missti þolinmæði sína, rifið um axlirnar á manninum, dregið hann upp og byrjað að ýta honum út af staðnum. Sá ákærði hafi streist á móti, en þá hafi tveir dyraverðir til viðbótar komið til að taka hann út. Hann segist hafa reynt að ná athygli eins dyravarðarins, með því að narta í höndina á honum. Hann vildi meina að um saklaust „nart“ væri að ræða, og hann hefði ekki læst tönnunum sínum.

Reyndi að hrista hann af sér

Brotaþoli lýsti bitinu ekki sem „narti“. Hann sagði að ákærði hafi bitið hann í og það hafi verið verulega óþægilegt. Fyrst hafi hann reynt að hrista manninn af sér, en það ekki virkað. Honum hafi þó tekist að losa hann af sér með hnefahöggi í höfuðið.

Í kjölfarið hafi ákærða verið haldið niðri á meðan að lögreglu var beðið og þá tók brotaþoli mynd af bitfarinu á upphandlegg sínum sem var rautt.

Dómari taldi ákæruvaldinu hafa tekist að færa sönnur fyrir því að ákærði hefði bitið dyravörðinn og því hlaut hann dóm.

Líkt og áður segir var um þrjátíu daga  skilorðsbundinn dóm að ræða, auk þess þurfti maðurinn að greiða máls- og sakarkostnað, auk launum til verjenda síns. Samtals er sá kostnaður rúm ein og hálf milljón króna.