Fréttablaðið skýrir frá þessu í dag. Haft er eftir Birni Rúnari Lúðvíkssyni, yfirlækni ónæmisfræðideildar Landspítalans, að líklega sé um beina tengingu á milli aukinna sóttvarna og minni sýklalyfjanotkunar að ræða. „Fólk er náttúrlega að huga sérstaklega vel að smitvörnum núna og er meira heima, þá verður smittíðni almennt minni í samfélaginu og þar af leiðandi verður sýklalyfjanotkun minni,“ er haft eftir Birni sem sagði aðspurður að of snemmt sé að segja hvaða áhrif þetta geti haft á sýklalyfjaónæmi. Alþjóðaheilbrigðismálastofnunin WHO hefur metið sýklalyfjaónæmi sem eina mestu ógnina við heilbrigði í heiminum.
„Sýkla- og veirufræðideild Landspítalans hefur haldið gríðarlega vel utan um tíðni fjölónæmra baktería og sem betur fer höfum við ekki verið í hættulegum tölum hér á landi en þetta fer vaxandi,“ er haft eftir Birni. Fjölónæmar bakteríur eru bakteríur sem sýklalyf virka ekki á. „Bakteríur eru alveg ótrúlega sniðugar og fljótar að mynda ónæmi og vírusinn er náttúrlega að stökkbreytast líka, hann finnur sér leiðir fram hjá svo þetta á líka við um vírusa, en bakteríurnar eru það sem við höfum haft meiri áhyggjur af í gegnum tíðina,“ sagði Björn einnig.
Hann sagði að fjölónæmisbakteríustofnar hafi komið upp hér á landi en starfsfólk Landspítalans sé stöðugt á varðbergi gagnvart sýkingum af því tagi og sé reglulega skimað fyrir slíkum sýkingum.
Hann sagði jafnframt að segja megi að það sé jákvæður punktur í heimsfaraldrinum að það dragi úr notkun sýklalyfja sem muni aftur draga úr fjölónæmum bakteríum. Hann sagðist þó telja að þróunin breytist hratt þegar slakað verður á sóttvarnareglum. „Þá fer fólk að sýkjast aftur, en ekki aðeins vegna þess heldur er tíðni sýkinga alltaf há á þessum árstíma,“ sagði hann.
