Ragnar Þór Ingólfsson segir fréttaflutning af meintri þátttöku sinni í veiðiþjófnaði í Holtsá í Vestur-Skaftafellssýslu fyrirsjáanlega ófrægingarherferð í aðdraganda formannskosninga í VR. Ragnar er sitjandi formaður en í síðustu viku varð það ljóst að hann myndi fá mótframboð. Hann þverneitar fyrir það að hafa tekið þátt í veiðiþjófnaðinum, en viðurkennir að hafa verið gestkomandi hjá landeiganda.
Fréttablaðið sagði frá því í morgun að veiðiþjófnaður í landi í eigu Seðlabankans hefði verið kært fyrr í vetur. Hafði þar hópur manna lagt net í Holtsá sem rennur út í Skaftá. Lögreglan á Suðurlandi staðfesti við Fréttablaðið að kæra vegna málsins hefði borist embættinu.
Í samtali við DV sagði Ragnar málið honum óviðkomandi og að hann hafi látið fréttamanni Fréttablaðsins allar þær upplýsingar í té sem hann þurfti til að sjá það. „Ég var gestur á Holti hjá landareigendum. Ég hef ekki fengið neina kæru, ekki kallaður í skýrslutöku og ég á fund með lögmönnum núna klukkan níu.“
Spurður hvort til standi að leggja fram kæru vegna málsins svarar Ragnar: „Það er ekkert hægt að svara þessu öðruvísi.“ Ragnar segir jafnframt málið tengjast ófrægingarherferð gegn sér. Aðspurður hvort það sú ætlaða herferð tengist yfirstandandi kosningabaráttu til formanns VR segir Ragnar það blasa við. „Þegar fréttamaður hefur aðgang að þeim sem bera ábyrg á málinu og geta staðfest að ég kom ekki nálægt þessu en nýtir sér ekki þá vitneskju, gefur það ekki augaleið að það er eitthvað annað sem býr að baki?“
Ætlar þú að leita réttar þíns?
„Að sjálfsögðu. Ég var alveg undir þetta búinn að farið yrði í einhverskonar ófrægingarherferð gegn mér. Ég var búinn að undirbúa minn lögmann alveg undir það,“ sagði Ragnar. „Eins og ég segi, ég átti von á ýmsu, en kannski ekki svona lágkúru ef ég á að vera alveg hreinskilin.“
Ragnar segist ekki geta sagt hvað komi út úr fundinum með lögmanni sínum. „Það munu þeir sem bera ábyrgð á þessum fréttaflutningi fá að vita fyrstir.“
Auglýst var eftir framboðum til stjórnar og formanns VR í lok janúar og rann framboðsfrestur út á mánudaginn í síðustu viku. Til formanns bjóða sig tveir fram: Ragnar Þór og Helga Guðrún Jónasdóttir, stjórnmála- og fjölmiðlafræðingur.
