Fjölskylda Johns Snorra Sigurjónssonar, fjallagarps, sem hefur verið saknað síðan 5. febrúar á fjallinu K2 í Pakistan sendir þakkir til þeirra sem hafa tekið þátt í leitinni á fjallinu stóra sem og þakkir fyrir þá umhyggju og stuðning sem fjölskyldan hefur fengið undanfarna viku. Þetta kemur fram í fréttatilkynningu.

Fréttatilkynningin:

Enn hefur leitin að þeim John Snorra, Muhammad Ali Sadpara og Juan Pablo Mohr á K2, undir stjórn pakistanskra yfirvalda, ekki borið árangur.

Pakistönsk yfirvöld hafa nú ákveðið að halda grunnbúðum opnum og leit mun halda áfram eftir því sem veður og aðstæður leyfa.

„Ég vil ítreka þakkir mínar til allra sem hafa tekið þátt í leitinni að þeim John Snorra, Ali og J Pablo. Leitin er mjög krefjandi og hefur verið stýrt af pakistönskum yfirvöldum og fagmennska borgaraþjónustu utanríkisráðuneytisins hefur verið ómetanleg. Þeir félagar eru enn týndir en vonin um kraftaverk lifir. Hjörtu okkar, ástvina þeirra, slá með þeim.“, segir Lína Móey, eiginkona John Snorra. „Það er búið að vera ótrúlegt að finna þann kraft sem hefur verið í leitinni, bæði af hálfu íslenskra, pakistanskra og síleskra yfirvalda. Ekki síður hefur sú umhyggja og sá stuðningur sem fjöldi fólks hefur sýnt okkur styrkt fjölskylduna á þessum erfiðu tímum. Hjartans þakkir til ykkar allra.“