„Langar að vita skoðun ykkar á einu máli sem snertir sundlaugar og trans fólk,“ skrifaði móðirin í færslunni sem hefur vakið mikil viðbrögð, bæði innan og utan hópsins. „Vil taka það fram að ég er alls ekki á móti trans fólki, finnst auðvitað að allir eigi að fá að vera þeir sjálfir. Hins vegar finnst mér mikilvægt að réttindi eins traðki ekki á réttindum annarra. Í hverju það felst er svo auðvitað álitamál og munu aldrei allir vera sammála.“
Konan útskýrir málið en maðurinn hennar og sonur þeirra fóru saman í sund. „Þeir komu heim hálf stjarfir þar sem með þeim í sturtu var transmaður sem enn var líffræðilega kona (að vísu fleiri en einn, mislangt komnir í ferlinu). Drengurinn sem er bara 13 algjörlega fraus og honum leið svo illa. Kallinum leið enn verr liggurvið því þetta var auðvitað alls ekki það sem þeir bjuggust við að sjá þegar þeir fara inn í kynjaskipta klefann ætlaðan karlmönnum (eftir líffræðilegu kyni).“
Eins og áður segir þá vakti færslan mikil viðbrögð. Mikill fjöldi mæðra hefur skrifað athugasemdir við færsluna en ekki eru allir á sama máli. „Ég væri engan veginn hress ef karlmaður væri í kvennaklefanum. Þið vitið, karlmaður með lim… sama hvort sú manneskja væri á leiðinni í leiðréttingu,“ sagði ein móðirin. „Hér eru reglur! Og á meðan þú ert í karlkyns líkama áttu að fara í karlkyns líkama áttu að fara í karlkyns sundklefann… hvað ef það væru allt í einu 10 fullorðnir karlmenn í kvennaklefanum? Hvað ef einhver þeirra er ekki á leiðinni í leiðréttingu heldur er hann perri? Hvað ef svo einn þeirra heldur á símanum sínum? Eins og það sé ekki nógu vont að kona haldi á símanum? Til hvers höfum við þá reglur?“
Þá sagðist önnur móðir hafa enga fordóma þegar kemur að transfólki, eða öðrum meðlimum hinsegin samfélagsins. „En þegar að þú lítur út eins og kona þá finnst mér að þú eigir heima í kvennaklefanum,“ sagði móðirin. „Mér myndi ekki líða vel ef trans karlmaður myndi birtast í sturtunni við hliðina á mér.“
Fleiri mæður tóku í sama streng en þó voru líka fjölmargar mæður sem sögðu þetta vera gott og blessað. Ein móðir sagði að þetta væri tilvalin tímasetning til að útskýra fyrir syninum og fræða hann. „Það eru ekki allir eins og sumir fæðast í vitlausum líkama og þurfa langt og erfitt ferli til þess að leiðrétta það… ef þessir menn voru áður konur eru þeir samt karlar og ættu því auðvitað að fara í karlaklefann.“
Ein móðir segist vera þaklát fyrir það að heimurinn sé orðinn þannig að fólk treysti sér til þess að fara í þá klefa sem hentar þeim frekar en að fara í einkaklefa. „Allt í lagi að verða hissa en þetta er bara snilld og jákvæð þróun. Þeir sem eru öðruvísi eiga ekki að þurfa að vera sér, það þurfa bara allir að víkka aðeins sjóndeildarhringinn,“ segir hún.
Þá tjáir ein móðir sig sem á son sem er trans maður. „Samkvæmt sumum hérna þá á sonur minn bara að skella sér í sérklefa vegna þess að einhverjum gæti fundist óþæginlegt að sjá strák með píku og engin brjóst? Veistu nei, hann er sonur minn og í karlaklefanum á hann heima,“ segir móðirin. „Hann lagði ekki á sig sárar hormónasprautur og brjóstnám vegna þess að honum langaði að sjá nokkur typpi. Hann er karlmaður! Trans karlmaður.“
Móðirin sem skrifaði upphaflegu færsluna breytti færsluna eftir umræðuna. „Nú hafa ansi mörg góð svör komið sem hjálpuðu okkur að skilja betur,“ segir hún. „Umræðan var auðvitað tekin í fjölskyldunni og öll vorum við á sama máli – okkar fyrstu viðbrögð voru röng, nú vitum við betur og eigum ekki eftir að kippa okkur upp við þetta næst. Enda meikar þetta „gegt mikið sense“ eins og unglingurinn sagði þegar við vorum búin að fá að heyra sjónarmið annarra.“
Þá þakkar hún þeim sem komu með góð svör og deildu sínum upplifunum. „Mikið vona ég að þrátt fyrir að þessi umræða var ekki jákvæð í byrjun frá mér þá stuðli hún að því að fleiri fræðist og þar af leiðandi trans fólki komi till með að líða betur í sínum klefa og þurfi alls ekki að veigra sér við að fara í sund og njóta.“
