Laust eftir miðnætti missti 17 ára ökumaður stjórn á bíl sínum á Vesturlandsvegi þar sem hjólför voru full af vatni. Ók hann á vegrið, síðan yfir tvær akreinar og endaði utan vegar í gróðri. Tveir farþegar voru í bílnum en ekki urðu slys á fólki.
Þetta og neðangreint kemur fram í dagbók lögreglu.
Um ellefuleytið í gærkvöld var tilkynnt um líkamsárás í Hafnarfrði. Lögreglan var kvödd að veitingahúsi og var maður handtekinn, grunaður um líkamsárás, eignaspjöll og ofbeldi gegn opinberum starfsmanni. Var maðurinn vistaður í fangageymslu lögreglu.
Slys varð á Laugavegi um ellefuleytið í gærkvöld er maður féll af rafskutlu og rotaðist. Hlaut hann áverka á höfði. Maðurinn var fluttur með sjúkrabíl á Bráðadeild til aðhlynningar.
Um sama leyti féll 15 stúlka af vespu í Breiðholti. Fékk hún skurð fyrir ofan augabrún og hjálmur hennar losnaði. Sjúkrabíll kom á vettvang.
Öldurhús og krár voru lokaðar í gærkvöld og við eftirlit á 30 slíkum stöðum reyndist lokunin vera virt.
