Björn Ingi Hrafnsson, ritstjóri Viljans, sendir Íslendingum tóninn í myndbandi sem hann birti á Facebook í dag. Bendir hann þar á að ný bylgja COVID-19 ætti ekki að koma Íslendingum á óvart í ljósi þess hversu mikið þjóðin hefur slakað á sóttvörnum.

„Það sem er að gerast núna með mesta fjölda nýsmitaðra á einum degi í fjóra mánuði þarf ekki að koma neinum á óvart. Umræðan síðustu daga hefur öll snúist um gagnrýni á sóttvarnaryfirvöld fyrir of harðar aðgerðir og það er eins og fólk sé algjörlega búið að gleyma því að þetta er bráðsmitandi sjúkdómur sem fer hratt á milli manna og maður hefur séð á samfélagsmiðlum undanfarið að það eru mjög fáir að fara eftir þeim tilmælum sem gefin hafa verið. Þess vegna er veiran farin að breiðast út um allt. Bara því miður.

Þó svo í dag séu ekki margir alvarlega veikir þá getur staðan breyst mjög hratt.

„Gleymum ekki að þó að ekki séu margir um þessar mundir að veikjast alvarlega þá getur það gerst á síðari stigum. Við vitum að það tekur 1-3 vikur að gerast. En þar að auki liggur fyrir, samkvæmt nýjustu rannsóknum, að allt að þriðjungur þeirra sem veikjast af veirunni geta fengið langtíma einkenni, miklar aukaverkanir – orkuleysi, síþreytu og svo framvegis – og þurfa jafnvel að glíma við það marga mánuði eða lengur. Þetta er dauðans alvara og það er því miður kominn tími til að við áttum okkur á því að þessi veira er út um allt í samfélaginu og við verðum að passa okkur, annars fer illa. Það er bara staðfest.“