Á miðnætti annað kvöld taka gildi hertari reglur um samkomur. Á stöðufundi vegna kórónuveirufaraldursins í dag sagði Víðir Reynisson yfirlögregluþjónn að líklega yrði fólk beðið um að haga innkaupum sínum þannig að aðeins einn úr hverri fjölskyldu sinnti þeim og væri jafnvel beðinn um að vera með innkaupalista tilbúinn.

Að sögn Víðis verður áfram unnið eftir því að treysta fólki til að fara eftir tilmælum stjórnvalda en fullyrti að staðir sem færu ekki eftir settum reglum gæti verið lokað fyrirvaralaust.

Langflest smit eru á höfuðborgarsvæðinu eða 464. Á  Suðurlandi hefur sýkingum fjölgað mikið síðasta sólarhringinn. Þar hafa 56 greinst með kórónuveiruna og 707 eru í sóttkví. Stærstur hluti þeirra er í Vestmannaeyjum þar sem gripið hefur verið hertra aðgerða og samkomubann er bundið við tíu.