Líkamsræktarstöðin World Class hefur sagt upp 90 starfsmönnum en uppsagnirnar taka gildi um áramótin. Einungis hlutastarfsmenn misstu vinnuna en fólkið gegndi ýmsum stöðum innan fyrirtækisins. RÚV greindi frá uppsögnunum.

Björn Leifsson, eigandi og framkvæmdastjóri World Class, ræddi við RÚV um uppsagnirnar. Þetta er í annað skipti á skömmum tíma sem mikill fjöldi starfsmanna World Class missir vinnuna en 50 manns var sagt upp í nóvember. „Núna þurftum við að segja upp öllum sem voru í starfshlutfalli undir 70%, sem  hlutabótaleið nær ekki yfir,“ segir Björn í samtali við RÚV. World Class hefur nú sagt upp tæplega helmingi starfsmanna fyrirtækisins.

Samkvæmt Birni hefur World Class tapað háum fjárhæðum vegna kórónuveirunnar. Björn segir fyrirtækið hafa orðið af 1,3 milljarði af tekjum á þessu ári. Vegna tapsins er því ekki hægt að gera mikið annað en að segja upp fólki. Aðallega voru það starfsmenn í afgreiðslu og barnagæslu sem misstu vinnuna að þessu sinni.

Björn segir í samtali við RÚV að það sé líklegt að starfsmennirnir sem voru reknir verði ráðnir aftur, það er að segja ef líkamsræktarstöðvar fá að opna aftur. „En ég sé ekki að það verði á næstunni. Eins og ég hef sagt áður þá  finnst mér þetta vera fáránleg mismunun, að það megi vera íþróttir allsstaðar og sundlaugar opnar – en líkamsræktarstöðvar megi ekki vera opnar. Við getum verið með grímuskyldu, við getum passað bæði sóttvarnir og fjarlægðarmörk. Það er gríðarlega erfitt að vera í þessari stöðu.“