Á níunda tímanum í gærkvöldi var tilkynnt um líkamsárás og rán í Bústaðahverfi. Þar var maður að aka öðrum manni, sem hann þekkti lítið, þegar farþeginn kýldi hann í andlitið, krafði hann um peninga og hótaði honum lífláti. Hann stal síðan rafmagnshlaupahjóli sem var í aftursætinu og lést sig hverfa á brott. Ökumaðurinn leitaði aðstoðar á slysadeild.

Á tíunda tímanum var lögreglunni tilkynnt um yfirstandandi innbrot í hús í Mosfellsbæ. Þar var maður handtekinn, grunaður um húsbrot, líkamsárás, vörslu fíkniefna og brot á vopnalögum. Hann var vistaður í fangageymslu.

Skömmu upp úr miðnætti var akstur 15 ára barns stöðvaður á Seltjarnarnesi en lögreglumenn sáu ökumanninn aka upp á kantstein, hann gaf ekki stefnuljós og var ekki með ökuljósin kveikt. Tveir farþegar voru í bifreiðinni, 14 og 16 ára. Málið var afgreitt með aðkomu forráðamanna og tilkynningu til barnaverndaryfirvalda.

Á sjötta tímanum í gær neitaði ölvuðu kona að greiða reikning sinn á veitingahúsi í borginni. Málið var afgreitt á vettvangi. Á svipuðum tíma voru tvær 15 ára stúlkur staðnar að þjófnaði úr verslun en þar stálu þær fatnaði. Málið var afgreitt með aðkomu foreldra og tilkynningu til barnaverndaryfirvalda.

Á tíunda tímanum í gærkvöldi voru höfð afskipti af 16 ára pilti sem var staðinn að þjófnaði úr verslun á Grandanum. Málið var afgreitt með aðkomu foreldra og tilkynningu til barnaverndaryfirvalda.

Á sjöunda tímanum í gær var ökumaður handtekinn í Háaleitishverfi en hann er grunaður um að hafa verið undir áhrifum fíkniefna og ekki með gild ökuréttindi. Bifreið hans reyndist ótryggð. Barn var í  bílnum og var það sótt af ættingja.

Á ellefta tímanum var ökumaður handtekinn í Hafnarfirði eftir að hann lenti í umferðaróhappi. Hann er grunaður um ölvun við akstur og ítrekaðan akstur sviptur ökuréttindum. Hann var vistaður í fangageymslu.

Þrír ökumenn voru handteknir í gærkvöldi og nótt, grunaðir um að vera undir áhrifum fíkniefna og/eða áfengis.