Aðstæður á fasteignamarkaði virðast vera að breytast og svokallaður kaupendamarkaður að myndast. Verktakar hafa að undanförnu lækkað verð á nýjum íbúum í miðborg Reykjavíkur. Einnig hafa verktakar boðið kaupendum að gera tilboð í nýjar íbúðir á Hlíðarenda en óalgengt er að slíkt sé í boði svo snemma í söluferlinu.

Morgunblaðið skýrir frá þessu. Fram kemur að samkvæmt kaupsamningum sem blaðið hefur undir höndum hafi verð nýrra íbúða lækkað um allt að sex milljónir frá auglýstu verði en í þeim tilfellum hafi kaupendur keypt íbúðir fyrir hundruð milljóna. Fermetraverðið hafi lækkað úr tæplega 700 þúsund krónum í um 600 þúsund. Flestar íbúðanna eru litlar og án bílastæða.

Blaðið segir að einnig séu vísbendingar um verðlækkanir utan miðborgarinnar. Vaxtalækkanir Seðlabankans hafa ekki dugað til að halda verðinu uppi. Einnig hefur verið dregið úr framboði með því að seinka nýjum verkefnum. Þá hefur markaður fyrir skammtímaleigu íbúða til ferðamanna dregist saman en það skerðir tekjumöguleika íbúðaeigenda.

Haft er eftir Óskari Bergssyni, fasteignasala hjá Eignaborg í Kópavogi, að kaupendamarkaður hafi myndast að undanförnu þar sem framboð sé meira en eftirspurn. Ágæt sala hafi verið að undanförnu á höfuðborgarsvæðinu, ekki síst á 2 til 4 herbergja íbúðum í fjölbýlishúsum. Þær séu oft verðlagðar á 35 til 50 milljónir og seljist hratt ef verðlagningin sé rétt miðað við aðstæður.