Félagsmenn Flugvirkjafélags Íslands samþykktu nýjan kjarasamning með miklum meirihluta. Þetta kemur fram í tilkynningu frá Icelandair. Um er að ræða samning sem er vonað að muni styrkja samkeppnishæfni Icelandair á alþjóðavettvangi, en mikil harka hefur verið í kjaraviðræðum flugfélagsins við þrjár helstu starfsstéttirnar, flugvirkja, flugmenn og flugfreyjur.

Flugmenn hafa skrifað undir samning en ekki er ljóst hvort félagsmenn samþykki hann. Flugfreyjur standa enn í hörðu og vilja ekki ganga að kröfum Icelandair. Fyrr í dag var greint frá því að þær hefðu hafnað lokaboði flugfélagsins og virðast viðræður því komnar í strand. Vonir Icelandair stóðu til að allir samningar hefðu tekist fyrir föstudag, til að gera flugfélagið að álitlegri fjárfestingakosti í hlutabréfaútboði, en útboð þetta getur skipt sköpum fyrir framtíð félagsins.