Sjónvarpsmanninum Jóni Ársæli Þórðarsyni og RÚV hefur verið stefnt af viðmælanda sem kom fram í þættinum Paradísarheimt í fyrravetur. Óhætt er að segja að þættir Jóns Ársæls hafi vakið athygli en þar var rætt við Íslendinga sem segja má að syndi gegn straumnum.
Ólafur Valur Guðjónsson, lögmaður konunnar, staðfesti við Fréttablaðið, sem greinir frá þessu, að málið tengist þættinum en leynd ríkir þó yfir því um hvað málið nákvæmlega snýst og hverjar kröfur konunnar eru.
Fréttablaðið segir þó frá því að í umræddum þætti ræði Jón Ársæll við konuna sem afplánaði dóm á Sogni. Sagði hún meðal annars frá uppvaxtarárum sínum og baráttu við fíkn. Málið verður tekið fyrir í Héraðsdómi Reykjavíkur í dag.
Þættir Jóns Ársæls vöktu sem fyrr segir nokkra athygli og voru ekki allir á eitt sáttir um þættina. Þannig greindi DV frá óánægju ungs manns, Viðars Marels Magnússonar, sem sást í mynd í einum þáttanna. Var hann nafngreindur sérstaklega þó hann væri persónulega ekki til umfjöllunar, heldur frænka hans, ung skáldkona.
