Sjálfstæðisflokkurinn hélt upp á 90 ára afmæli sitt í gær. Í tilefni dagsins var blásið til hátíðarhalda hjá félögum Sjálfstæðisflokksins um land allt. Um 600 manns tóku þátt í hátíðarhöldunum í höfuðstöðvum Sjálfstæðisflokksins í Valhöll. Þar var boðið upp á ýmsar veitingar og skemmtiatriði fyrir fjölskylduna.
Eyþór Laxdal Arnalds, oddviti Sjálfstæðisflokksins í Reykjavík lék á selló og líkt og gjarnan gerist í afmælisveislum voru gefnar afmælisgjafir.
Viðreisn og Framsókn gáfu fallega blómvendi, Vinstri Grænir gáfu reynitré og Samfylkingin gaf bókina Líftaug landsins – Saga utanríkisverslunar og friðarlilju.
Katrín Jakobsdóttir, forsætisráðherra, var ein þeirra sem fór með ávarp á hátíðinni og fór hún þar fögrum orðum um formann Sjálfstæðisflokksins og kollega sinn Bjarna Benediktsson, fjármálaráðherra. Þar þakkaði hún ráðherrum Sjálfstæðisflokksins fyrir ánægjulegt samstarf á kjörtímabilinu og nefndi Bjarna Benediktsson sérstaklega á nafn og sagði hann einn besta samstarfsmann sem hún hefur nokkru sinni haft. Uppskáru ummælin mikinn fögnuð viðstaddra. Katrín tók fram að það væri svolítið skrítið að formaður vinstri hreyfingar sem lengi vel var helsti andstæðingur Sjálfstæðisflokksins tæki til máls á afmælishátíð þess síðarnefnda.
„En það er þannig í afmælum að þá sleppir maður öllu því sem miður hefur farið,“
Meðfylgjandi myndir voru teknar af ljósmyndaranum Håkon Broder Lund. Eins og sjá má af þeim var mikið um gleði, sama hvort um er að ræða sjálfstæðismenn, samstarfsaðila úr ríkisstjórnarsamstarfinu eða mótherja.