Gunnar Jóhann Gunnarsson, sem talinn er hafa orðið hálfbróður sínum, Gísla Þór Þórarinssyni, að bana um síðustu helgi með byssuskoti, neitar því að um ásetningsbrot hafi verið að ræða og segir atburðinn hafa verið slys. Hann neitar því að hafa komið að heimili Gísla Þórs með þann ásetning í huga að verða honum að bana.

Þetta kemur fram í frétt RÚV en fréttastofan ræddi við verjanda Gunnars Jóhanns. Gunnar Jóhann var yfirheyrður af lögreglu í morgun og gaf þá framburð í samræmi við þetta. Gunnar Jóhann er 35 ára gamall, en hálfbróðir hans, Gísli Þór, var fertugur. Atburðurinn átti sér stað í smábænum Mehamn í Finnmörku í Noregi um síðustu helgi. Þessi framburður Gunnars Jóhanns er í samræmi við Facebook-færslu sem hann birti rétt eftir atburðinn, þar sem hann játaði að hafa orðið hálfbróður sínum að bana, en sagði það hafa verið slys. Hann hefði óvart hleypt skoti af.

32 ára gamall Íslendingur var í för með Gunnari Jóhanni að heimili Gísla Þórs, Almar Smári Ásgeirsson. Hann neitar allri hlutdeild í glæpnum. Samkvæmt frétt DV í gær trúir fjölskylda hans á sakleysi hans. Þar kemur einnig fram að samkvæmt norskum fjölmiðlum var Almar Smári með Gunnari Jóhanni í fimm tíma eftir voðaatburðinn.

Gunnar Jóhann á að baki langan sakaferil á Íslandi. Hann hefur meðal annars verið dæmdur fyrir nauðgun og ofbeldisbrot.