Mislingar eru bráðsmitandi. Á árunum 1998 til 2017 greindust aðeins þrjú tilfelli mislinga hér á landi. Fjögur smit á skömmum tíma eru því mikil breyting. Fréttablaðið skýrir frá þessu.
Blaðið hefur eftir Þórólfi Guðnasyni, sóttvarnarlækni, að unnið sé að því að lágmarka líkurnar á að fleiri smitist.
„Nú er unnið eftir ákveðnu verklagi en eins og staðan er núna er ekkert sem bendir til þess að lítill faraldur sé í vændum. Það gerist hins vegar að smitberi kemur til landsins sem sýnir okkur bæði hversu smitandi mislingar eru og hversu mikilvægt sé að sem flestir séu bólusettir fyrir mislingum.”
Er haft eftir honum.
Jón Magnús Kristjánsson, yfirlækni bráðadeildar Landspítalans, sagði að sóttvarnarlæknir stýri nú aðgerðum til að bregðast við og takmarka útbreiðslu sjúkdómsins.
”Ung börn að átján mánaða aldri auk þeirra sem ekki hafa verið bólusettir eru útsett fyrir þessari veirusýkingu. Við getum vel tekist á við svona mál en svo gæti farið að plássleysi valdi okkur einhverjum erfiðleikum ef margir smitast.“
Sagði Jón.
Eins og fram kom í fréttum í gær þá er annað barnanna, sem greindist með mislingasmit, á ungbarnaleikskólanum Hnoðraholti í Garðabæ. Önnur börn á þessum leikskóla, sem eru óbólusett vegna aldurs eða af öðrum ástæðum, hefur verið fyrirskipað að halda sig heima næstu tvær vikurnar og rúmlega það og eiga eins lítil samskipti við annað fólk og hægt er.
Bólusetningar við mislingum hefjast við átján mánaða aldur hér á landi og því hafa ung börn litla vörn gegn sjúkdómnum.
