Hagkerfið er vel í stakk búið að takast á við afleiðingar af gjaldþroti WOW Air, segir í yfirlýsingu frá ríkisstjórninni. Ríkisstjórnin fundaði vegna málsins í morgun og sendi eftirfarandi yfirlýsingu á fjölmiðla:
„Ríkisstjórn Íslands lýsir yfir vonbrigðum með að tilraunir WOW air hf. til að tryggja rekstur félagsins skiluðu ekki árangri. Viðbúnaðarhópur stjórnvalda fylgist grannt með því að heimflutningur farþega gangi greiðlega fyrir sig.
Rekstrarstöðvun WOW air hf. er mikið áfall fyrir starfsfólk félagins og aðra þá sem byggt hafa afkomu sína á starfsemi þess.
Staða efnahagsmála er sterk og hagkerfið vel í stakk búið að takast á við þessa áskorun. Efnahagsleg áhrif verða einkum til skamms tíma og kalla á endurmat áætlana en áhrifin til lengri tíma ráðast af þróun á markaði.“
Fram kom á fundi ríkisstjórnarinnar í morgun að 4000 manns væru strandaglópar vegna rekstrarstöðvunar WOW Air. RÚV greindi frá. Greindi Bjarni Benediktsson fjármálaráðherra frá þessu. Sigurður Ingi Jóhannsson sagði að ljóst hefði verið hvert stefndi rétt fyrir miðnætti í gærkvöld. Viðbragðsáætlun stjórnvalda hafi verið virkjuð en hún miði að því að koma fólki á áfangastað. Hafi verið haft samband við Icelandair og Easyjet í þeim tilgangi.
Samgöngustofa hefur send frá sér fréttatilkynningu vegna falls WOW Air þar sem farið er yfir réttindi strandaðra flugfarþega, hvernig þeir geta leitað upplýsinga og hvernig þeir eiga að komast á áfangastað. Þar er farþegum ráðlagt að leita til annarra flugfélaga og þeim sem greiddu flugmiða með kreditkorti er bent á að hafa samband við kreditkortafyrirtækið til að fá miðann endurgreiddan. Sjá nánar á vef Samgöngustofu.
