Óróinn á flugmarkaði er farinn að hafa áhrif á flugfargjöld, enda eru margir sem vilja ekki taka neina áhættu þegar kemur að flugi næstu daga.
Þannig er ódýrasta fargjald með Icelandair til Kaupmannahafnar næstkomandi föstudag 83.715 krónur. Þetta er svokallaður Flex miði þar sem innritaður farangur er ekki innifalinn. Ódýrasta fargjaldið með WOW Air þennan dag til Kaupmannahafnar er 14.255 kr.
Það er sömuleiðis ódýrasta fargjaldið, svokallað Basic, þar sem greiða þarf aukalega fyrir innritaðan farangur. Reyndar kosta flugmiðarnir enn minna hjá WOW dagana á undan.
Athygli vekur að það er ekki hægt að komast með Icelandair til Kaupmannahafnar frá fimmtudegi til þriðjudags fyrir lægra verð en 80 þúsund krónur – og enn og aftur erum við að tala um aðra leið. Svo virðist sem margir treysti því ekki að WOW Air muni fljúga næstu daga og færi sig yfir til samkeppnisaðilans.
Framtíð WOW ræðst í dag eða á næstu dögum. Skuldabréfaeigendur og kröfuhafar hafa flestir samþykkt að breyta kröfum sínum í 49% hlutafé, en eftir er að finna nýtt hlutafé upp á a.m.k. 5 milljarða kr. Tíminn er að renna út og mikil óvissa ríkir um framhaldið.
