Þetta kemur fram í nýrri könnun sem Zenter rannsóknir gerðu. Fréttablaðið skýrir frá þessu í dag. Þrjú prósent sögðust hlutlaus varðandi málið og þrjú prósent voru frekar eða mjög andvíg. Þrjú af hverjum fjórum sögðust mjög hlynnt slíkri skyldu.
Hvað varðar að bólusetning við mislingum yrði gerð að skilyrði fyrir inntöku á leikskóla sögðust rúmlega 90 prósent hlynnt því, 3,4 prósent voru hlutlaus og rúmlega 5 prósent andvíg.
Minnsti stuðningurinn við ofangreint mældist hjá þeim sem hafa lokið framhaldsprófi í háskóla en hann mældist um 90 prósent hjá þessum hópi.
Haft er eftir Þórólfi Guðnasyni, sóttvarnarlækni, að ekki sé hægt að segja að Íslendingar standi sig illa í bólusetningum en það sé hægt að gera betur. Landlæknisembættið stefnir á að bólusetningarhlutfallið sé yfir 95 prósent en það hefur verið á bilinu 90 til 95 prósent. Þórólfur segir að ástæðan sé líklegast innköllunarkerfi heilsugæslunnar. Hann hafi lagt til að það verði lagað og séð hverju það skilar áður en rætt er um skyldu til bólusetninga.
Hann segir að lítill hópur fólks sé á móti bólusetningum en rannsóknar benda til að það sé um tvö prósent mannfjöldans. Þórólfur segist óttast að bólusetningarskylda geti stækkað þennan hóp.
2.500 manns voru í úrtaki könnunarinnar og svöruðu 1.146.
