Steinbergur Finnbogason, lögmaður, var kvaddur til skýrslutöku í Héraðsdómi Reykjavíkur í gær. Þar spurði ríkissaksóknari hann út í minnisblað sem Steinbergur lagði fyrir dóm í máli skjólstæðings í fyrra. Sá skjólstæðingur er meintur höfuðpaur í Euromarketmálinu en rannsókn lögreglunnar á því máli er ein umfangsmesta rannsókn hennar á skipulagðri brotastarfsemi hér á landi til þessa.

Fréttablaðið skýrir frá þessu í dag. Segir blaðið að Steinbergur hafi verið krafinn svara um hvernig hann komst yfir minnisblaðið og hvort það hafi verið fyrir tilstilli þeirra sem áttu einir að hafa aðgang að því hjá yfirstjórnum þeirra embætta sem koma að rannsókninni eða annarra hjá þeim embættum. Þessi embætti eru Lögreglan á höfuðborgarsvæðinu og Suðurnesjum, Héraðssaksóknari, Ríkislögreglustjóri og Tollstjóri.

Fréttablaðið hefur eftir Steinbergi að hann megi ekki svara því hvað kom fram í skýrslutökunni þar sem þinghaldið hafi verið lokað en hann geti þó sagt að hann hafi ekki brugðist trúnaðarskyldu sinni við skjólstæðing sinn.

„Aðalatriðið að mínu mati er ekki hvaðan þetta minnisblað kom heldur það sem í því stendur. Það er enginn vafi í mínum huga að minnis blaðið sýnir möguleg mannréttindabrot gegn skjólstæðingi mínum og möguleg hegningarlagabrot lögreglu og á því mun ég meðal annars byggja málsvörn skjólstæðings míns ef og þegar þar að kemur.“

Ef haft eftir Steinbergi.

Arnar Þór Stefánsson, lögmaður, var Steinbergi til halds og trausts við skýrslutökuna. Í fyrstu fyrirtöku lýsti Arnar málinu sem lögfræðilegu sprengjusvæði og vísaði þar til trúnaðar verjanda við skjólstæðing sinn.