„Talið er að 80 ótímabær dauðsföll eigi rót sína að rekja til svifryksmengunar á Íslandi. Á þessu ári hefur svifryk farið 14 sinnum yfir heilsuverndarmörk.“

Þetta segir Egill Þór Jónsson, borgarfulltrúi Sjálfstæðisflokksins, í aðsendri grein í Morgunblaðinu í dag. Þar gagnrýnir hann meirihlutann í borginni fyrir áhugaleysi í loftgæðamálum Reykjavíkur.

Hann bendir á að borgarstjórn hafi í september í fyrra samþykkt tillögu eða yfirlýsingu um að svifryk færi aldrei yfir heilsuverndarmörk. Í kjölfarið hafi Sjálfstæðisflokkur lagt fram tillögu að aðgerðaáætlun til að bæta loftgæði borgarinnar svo svifryk færi ekki yfir heilsuverndarmörk.

„Meðal aðgerða sem lagðar voru til í tillögunni var endurskoðun á efnisvali borgarinnar varðandi gæði efna í malbiki, þrif yrðu aukin á umferðaræðum (sópun, þvottur og rykbinding), að frítt verði í strætó á „gráum dögum“, takmörkun þungaflutninga með efni sem valdið geta svifryksmengun á „gráum dögum“, dregið úr notkun nagladekkja í borgarlandinu og að íbúar í fjölbýlishúsum geti hlaðið rafbíla með auðveldum hætti, að nýting affallsvatns verði notuð í auknum mæli til að hita upp göngu- og hjólastíga borgarinnar og að endingu að unnið verði gegn dreifingu byggðar.

Egill segir að síðan tillagan var lögð fram hafi liðið rúmir átta mánuðir og svifryk mælist ítrekað yfir heilsuverndarmörkum eins og hann bendir á hér að framan. Honum hugnaðist ekki hugmyndir þess efnis að takmarkanir eða þvinganir verði lagðar á umferð þegar loftæði eru slæm. Sjálfstæðisflokkur muni aldrei styðja slíkar tillögur meirihlutans fyrr en unnið hefur verið eftir aðgerðaáætlun Sjálfstæðisflokksins. Sem betur fer hafi allir bæjarstjórar höfuðborgarsvæðisins tekið fyrir að ráðast í slíkar aðgerðir.

„Loftgæðamálin virðast meirihlutanum mjög viðkvæm enda hefur skynsöm fullbúin tillaga þess efnis beðið afgreiðslu í rúmlega átta mánuði. Skyldi ástæða þess að málið hafi ekki fengið afgreiðslu vera að meirihlutinn í Reykjavík hefur lítinn áhuga á að laga loftgæðamálin í Reykjavík, vegna þess að það hentar ekki hans pólitík? Því er strax stokkið á þær hugmyndir að banna og þvinga fólk til hegðunar sem það hefði ekki kosið sér sjálft, í stað þess að vinna að lausnum vandamálsins.“