Íbúi nokkur á Ásbrú segist hafa fengið sig fullsaddan af lausagöngu katta. Viðkomandi segir í hópi fyrir íbúa á svæðinu að kornið sem fyllti mælinn hafi verið köttur sem fór inn í íbúð hans og ældi út um allt. Íbúinn segir í samtali við DV að banna ætti lausagöngu katta líkt og hunda.
Innan fyrrnefnds hóps birtir íbúinn myndir af ælu kattarins. „Það er virkilega komið nóg núna af þessum lausagöngu köttum. Ég var með svefnherbergisglugga opin til að lofta út. Á meðan ég var ekki inn i herbergi, kom einhver köttur inn í herbergið okkar og ældi ofan á gluggakistuna, ofan í ofninn og á gólfinu. Ég er að sturlast út af ykkur kattaeigendum sem hugsa að þetta sé í lagi, að láta kettina ykkar út án eftirlits – skita, pissa og æla út um allt,“ lýsir þessi íbúi.
Hann bendir á að þetta yrði aldrei liðið ef hundur myndi æla á lóð fólks. „Hvernig væri ef ég myndi láta 30 kg labradorin minn út og skíta á grasblettinn ykkar, að koma með hundinn inn til ykkar og láta hana æla þar. Og svo labba bara i burtu. Segi að þetta sé ekki mitt mál!?! Virkilega skammist ykkur fyrir svona hegðun,“ skrifar íbúinn.
Í samtali við DV leggur íbúinn áherslu á að það þurfi að banna lausagöngu katta. „Það er komin tími til að banna lausagöngu katta. Ég, sem hundaeigandi, þarf að sjá um tíkina mína og þrifa eftir hana þegar hún gerir sínar þarfir. Ef hún fer i lausagögnu og hún er tekin, þarf ég að borga 9500kr til að fá hana aftur heim? Afhverju er það ekki þannig með kattaeigendar? Afhverju þarf ég að þrifa upp eftir kött, sem ælir inn í íbúðina mína og týna upp katta skítinn úr sandkassa barnsins míns sem vil fara leika?,“ spyr íbúinn.
