Skúli Gunnar Sigfússon, eigandi Subway á Íslandi, hefur áhyggjur af þeirri stöðu sem upp er komin í miðborginni vegna fregna af tíðum lokunum veitingahúsa. Þetta segir Skúli í viðtali í ViðskiptaMogganum í dag. Meðal þeirra staða sem lokað hafa að undanförnu má nefna Ostabúðina og Dill Restaurant.
„Maður er virkilega uggandi af því að þetta eru mjög góðir staðir sem farið hafa á hausinn. Þess utan sjáum við fína rekstraraðila gefast upp og það er mikið áhyggjuefni. Ef við einblínum á Reykjavík má fljótt sjá að álögur hafa snarhækkað, sem allt auðvitað endar á viðskiptavininum. Hann fær á endanum nóg og segir hingað og ekki lengra, enda neitar hann að greiða fyrir hækkandi launatengd gjöld, fasteignagjöld og aðrar álögur,“ segir Skúli í viðtalinu.
Skúli telur að þróunin verði sú að veitingastöðum fjölgi í úthverfum höfuðborgarsvæðisins. Því fagnar Skúli.
„Ef við tökum Garðabæ sem dæmi er núna hægt að velja milli fínna veitingastaða þar sem áður var engan stað að finna. Staðan í miðborginni er hins vegar mjög alvarleg og ég hef áhyggjur af því þegar verið er að loka gæðastöðum á borð við Dill og Ostabúðina. Það er ekki góð þróun.“