Í þessum skrifuðum orðum er gífurleg umferðarteppa frá Skútuvogi til Skeifunnar og sér ekki fyrir endann á henni. Ástæðan eru malbikunarframkvæmdir. Sjá má má bílaröð langt eftir Suðurlandsbrautinni í austurátt, sem mjakast ekki úr stað. „Ég er búin að vera föst í klukkutíma á Suðurlandsbrautinni,“ sagði kona sem hafði samband við DV.
Margir drepa tímann og fara í snjallsíma sína til að segja frá ástandinu. Ástæðan fyrir því eru malbiksframkvæmdir og ein kona skrifar á Facebook:
„Sá sem skipulegggur malbiksframkvæmdir báðum megin við Voga/Heima/Sund á háannatíma ætti kannski að hugsa málið.“
Önnur skrifar:
„Er búin að vera í 25 mín á leið út af bílaplani Húsasmiðjunnar í Skútuvogi út af umferðarteppu dauðans. Já, ég er búin að hringja í RUV“
Uppfært 17:50
DV náði sambandi við síðastnefndu konuna og var hún þá komin heim. Hún sagðist hins vegar hafa verið föst í umferðarteppunni í um eina og hálfa klukkustund.
Uppfært kl. 18: 15
Umferðarhnúturinn hefur loksins losnað. DV hafði tal af öðrum ökumanni sem var kominn heim og var einnig eina og hálfa klukkustund í teppunni. Spurning er hvort framhald verði á uppákomum sem þessum, enda háannatími malbiksframkvæmda hafinn.
